Fool ખીલે હૈ ગુલશન ગુલશન…


ક સંસ્કૃત સુભાષિતમાં કહ્યું છે કે જેમ દરેક પર્વત પરથી રત્નો મળતા નથી, દરેક વનમાં ચંદનના વૃક્ષો હોતા નથી એમ જ્ઞાનીઓ પણ દુર્લભ છે. પરંતુ આ વાત મૂર્ખાઓને લાગુ પડતી નથી. આ જગતમાં નાત, જાત, દેશ અને ધર્મના ભેદભાવ વગર મુર્ખ વ્યક્તિઓ તમામ જગ્યાએ અને લગભગ દરેક વેરાઈટીમાં મળી આવે છે! તમને ક્રીમ ફ્રુટ મઠ્ઠો, રાજભોગ મઠ્ઠો કે મેંગો મઠ્ઠો ખુબ ભાવતો હોય તો એ લેવા માટે મીઠાઈની દુકાને જવું પડે, પણ પૂ. શાહબુદ્દીન ભાઈએ જેમનો સમાજને વિગતે પરિચય આપ્યો છે એવા ‘અક્કલ મઠ્ઠા’ તમારી આસપાસ જ મળી આવશે. સવાલ ફક્ત એ ઘોઘા નરેશ હીરાઓને પારખવાની દ્રષ્ટિનો છે.

FKGGમૂર્ખ લોકોને ઓળખવા સહેલા છે. શાસ્ત્રોમાં વ્યસન, નિંદ્રા અને કલેશ પાછળ સમય વેડફનારાને મૂર્ખ ગણાવ્યા છે. કેટલાક પૂર્વાશ્રમના કવિ કાલિદાસની જેમ જે ડાળ પર બેઠા હોય એને જ કાપનારા હોય છે! સંસ્કૃતમાં એક સુત્ર છે – ‘आकृति गुणान कथयति’. અર્થાત અમુક એમના દેખાવથી જણાઈ આવે છે! તો અમુક બોલે એટલે પરખાય છે. આવા લોકોને મોકળું મેદાન આપશો તો તરત એ પોતાની મુર્ખામીનો ‘ડેમો’ આપશે! જરા ધ્યાનથી જોશો તો આવા અક્કલના એક્ઝીબીશનો ચોતરફ ચાલતા દેખાશે! કેટલાક રાજકીય પક્ષો તો આજકાલ આ છેલ્લા પ્રકારના મૂર્ખોને પક્ષના પ્રવક્તા પણ બનાવે છે!

મૂર્ખ લોકોનું સમાજમાં આગવું સ્થાન છે. ડાહ્યા લોકોને પોતે ડાહ્યા હોવાનું ગૌરવ એમને લીધે જ પ્રાપ્ત થાય છે. આ એક જાતનો સાપેક્ષવાદ છે! પણ આલ્બર્ટ આઇન્સ્ટાઈનના સાપેક્ષવાદ અને આ સાપેક્ષવાદ વચ્ચે એક પાયાનો તફાવત છે. વિજ્ઞાન મુજબ જ્યારે પદાર્થ પ્રકાશની ગતિએ મુસાફરી કરે ત્યારે તેના માટે સમય થંભી જાય છે. જ્યારે મૂર્ખ લોકોની બુદ્ધિનો વિકાસ અટકી જાય પછી એમના વિચારો વેગ પકડે છે! એમની અક્કલનો દીવો રાણો થાય પછી એ લોકો પહેલું કામ પોતાની તર્ક શક્તિને તડકે મૂકવાનું કરે છે અને પછી શરુ થાય છે બુદ્ધિ સામે ધુઆંધાર બેટિંગ! બુદ્ધિના બોલની પીચ પડવા દે એ બીજા! સચિન તો સોમી સેન્ચુરી પછી રીટાયર થશે પણ મૂરખાઓ કદી ક્રીઝ છોડતાં નથી! અને ઉપરવાળો પણ એટલો નટખટ છે કે એણે માનવ સમાજની ડીશ પર આવા અક્કલના ઓથમીરો રૂપી કોથમીર મન મૂકીને ભભરાવી છે!

મૂર્ખ લોકો સદીઓથી સમાજમાં હતા જ, છે અને રહેશે. કોઈ સંશોધન કરે તો આમલેટ બનાવવા માટે ડાયનોસોરનું ઈંડું ચોરવા જતાં દેવ થયેલા આદિમાનવના અશ્મીઓ પણ મળી આવે. લોક સાહિત્યમાં દરમાં આંગળી નાખ્યા પછી ‘આ કોનું દર છે?’ એવું પૂછનારા ‘ખર’ નો ઉલ્લેખ આવે છે. એક જગ્યાએ હાથે રજાઈઓ બાંધીને મોર બનીને ઉડવા જતાં કામ આવી ગયેલા વીરોના પાળીયા હોવાની પણ લોકવાયકા છે! અમારું તો માનવું છે સંત તુલસીદાસજીને પણ આવા લોકો મળ્યા જ હશે અને કદાચ એટલે જ એમણે લખ્યું હશે કે ‘તુલસી ઇસ સંસારમેં ભાત ભાત કે લોગ…’!

આપણે ત્યાં જેમ ‘ફોરેન’ની દરેક વસ્તુઓ શ્રેષ્ઠ ગણાય છે એમ મૂર્ખામીના ક્ષેત્રે પણ ભુરીયાઓ આપણાથી આગળ છે! હકીકતમાં એ લોકો ક્રેઝી હોય છે. સાહસ કરતા પહેલા વિચારવું એ એમના સ્વભાવમાં જ નથી. પછી એમાં સફળ થાય તો સાહસિક ગણાય છે અને બાકીના ‘દુનિયાનું અવનવું’ સેક્શનમાં છાપવા માટેનો મસાલો પુરો પાડે છે! ત્યાં કુતરા કે બિલાડીના નામે લાખો ડોલર વારસામાં મૂકી જનારા મળી આવે છે. ઓસ્ટ્રેલિયાના જોસેફ ગ્યુસો નામના યુવાને એક કૂતરી સાથે લગ્ન કર્યાના સમાચાર અખબારમાં વાંચ્યા હતા! કૂતરાં સાથે લગ્ન કરવાની પ્રથા આપણા ઝારખંડ રાજ્યમાં પણ છે. કહે છે કે એનાથી વિઘ્નો અને આપત્તિઓ દુર થાય છે! જોકે અમુક લોકો તો એવા પણ મળી આવશે જે લગ્નને જ મૂર્ખામી ગણતા હોય! લેકિન યે તો અપની અપની સોચ હૈ.

કહે છે કે ટેકનોલોજીના વિકાસ સાથે જ્ઞાનની ક્ષિતિજો વિસ્તરતી જાય છે. પણ કેટલાક કિસ્સાઓ એવા બને છે કે મનુષ્યની મૂર્ખામીની ક્ષિતિજો પણ એટલી જ ઝડપે વિસ્તરતી જણાય છે! આ મિલેનિયમનો આરંભ જ આપણે ‘મિલેનિયમ બગ’ના નામે મૂર્ખ બનવાથી કર્યો હતો, હવે ‘ગ્લોબલ વોર્મિંગ’ની સોગઠી પણ ગાંડી થયાના અહેવાલો છે! જોકે આમાં ‘આગાઝ ઐસા હૈ તો અંજામ કૈસા હોગા?’ નો જવાબ તો સમય જ આપશે, બાકી ‘બગ’નો કાલ્પનિક ભય બતાવીને કેટલીક બગ ભગત કંપનીઓ દુનિયાને ચૂનો લગાવી ગઈ હતી એ હકીકત છે!

અને આમ જુઓ તો ૧લી એપ્રિલ એ ગમ્મત ખાતર લોકોને મૂર્ખ બનાવવાનું એક નિમિત્ત છે બાકી આપણે બારે માસ વિવિધ પ્રકારે મૂર્ખ બનતા જ રહીએ છીએ! અબ્રાહમ લિંકને કહ્યું છે કે ‘તમે થોડા લોકોને ઘણા સમય માટે મૂર્ખ બનાવી શકો છો, ઘણા લોકોને થોડા સમય માટે મૂર્ખ બનાવી શકો છો પણ બધા લોકોને ઘણા સમય સુધી મૂર્ખ બનાવી શકતા નથી. પણ આપણા રાજકરણીઓને આ કળા પણ સાધ્ય છે અને એટલે જ ઠાલા વચનોના બદલામાં વોટ આપીને મૂર્ખ બનવું એ લગભગ આપણી નિયતી બની ગયું છે!

462
To read article online, click …
http://issuu.com/feelings/docs/feelingsmultimedia?mode=window&backgroundColor=%23222222

About 'બધિર' અમદાવાદી

Columnist with: નવગુજરાત સમય દૈનિક (Jointly with Adhir Amdavadi) ફીલિંગ્ઝ ગુજરાતી મેગેઝીન (કહત બધિરા) Wrote for: મારી સહેલી મેગેઝીન (Monkey बात) અભિયાન મેગેઝીન (Special issues) દિવ્ય ભાસ્કર ડોટ કોમ (બધિર ખડા બાઝાર મેં)
This entry was posted in कहत बधिरा... and tagged , , , , , . Bookmark the permalink.

1 Response to Fool ખીલે હૈ ગુલશન ગુલશન…

  1. Bhumika Modi કહે છે:

    આ જગતમાં નાત, જાત, દેશ અને ધર્મના ભેદભાવ વગર મુર્ખ વ્યક્તિઓ તમામ જગ્યાએ અને લગભગ દરેક વેરાઈટીમાં મળી આવે છે! ,,,Very true…કહે છે કે” ગાંડા ના ગામ ના હોય” પણ દરેક ગામમાં ગાંડા તો જરૂર હોય જ।।।મઝા આવી ગઈ।

    Like

આપનો પ્રતિભાવ અમારા માટે અમુલ્ય છે. પ્રતિભાવ આપતી વખતે નીચે આપનું નામ લખવાનું ચૂકશો નહિ.

Fill in your details below or click an icon to log in:

WordPress.com Logo

You are commenting using your WordPress.com account. Log Out /  બદલો )

Google photo

You are commenting using your Google account. Log Out /  બદલો )

Twitter picture

You are commenting using your Twitter account. Log Out /  બદલો )

Facebook photo

You are commenting using your Facebook account. Log Out /  બદલો )

Connecting to %s