ડીયર પ્રિન્સીપાલ સર …


Dear Principal Sir

Click on above photo to read this and other articles online on Abhiyaan Gujarati Weekly magazine.

ડીયર પ્રિન્સીપાલ સર,

આપની સેવામાં પુ. કે. સળીકરના જય ભારત વાંચશોજી. મારો દીકરો સલ્લુ ઉર્ફે સલીલ પુષ્કર સળીકર આપની જ સ્કૂલમાં કે. જી.માં અભ્યાસ કરે છે અને એ રીતે આપની સ્કૂલ સાથે અમારે છેલ્લા દોઢેક વર્ષથી પ્રેમ ભર્યો નાતો છે. આમ તો વાલીઓ અને શિક્ષકો વચ્ચેનો સંબંધ ગોળ અને કંસાર જેવો કહેવાય અને અમારે અમારા સલ્લુની કેરિયરનો કંસાર બનાવાનો છે થુલી નહિ એટલે આ કાગળ લખવા પ્રેરાયો છું.

તમે લોકો કાયમ કહો છો કે વાલીઓએ જાગૃત રહેવું જોઈએ. તો મારે તમને જણાવવાનું કે હું વાલી હોવા ઉપરાંત એક જાગૃત નાગરિક પણ છું અને એટલો જાગૃત છું કે મારી અરજીઓના કારણે મ્યુનીસીપાલીટીના પાણી-ગટરવાળા, આરોગ્યવાળા અને દબાણ ખાતાવાળાથી માંડીને ઈલેક્ટ્રીસીટીવાળા અને પોલીસવાળા સુધીના લોકો કંઈ ને કંઈ કામ અર્થે અમારી સોસાયટીની મુલાકાત લેતાં રહે છે. એકાદ મહિનો અરજી વગરનો જાય તો અમુક લોકો ઘરે આવીને ખબર પણ પૂછી જાય છે અને કેટલાક સમજુ લોકો દિવાળીમાં ગીફ્ટ પણ મોકલાવે છે. પણ આ એવી કોઈ અરજી નથી એ આપની જાણ સારું. મારે તો બે-ત્રણ બાબતો તરફ તમારું ધ્યાન દોરવાનું છે, માટે ટેન્શન લેતાં નહિ.

અને તમે સાચા છો. જાગૃતિ હોવી જ જોઈએ. પણ એ બંને પક્ષે હોવી જરૂરી છે. આમાં ‘મૈ જાગું, તુમ સોજાઓ… હોઓઓ…’ જેવું ન ચાલે. આ તમારી સ્કૂલના ઝાંપે બેસાડેલા સિક્યોરીટી ગાર્ડને જ જુઓ. અજીબ નમુનો છે! એને ખુરશી ખોટી આપી છે, ખાટલો જ આપવો જોઈતો હતો. જ્યારે જુઓ ત્યારે ઝોકા જ ખાતો હોય છે. અને જાગતો હોય તો કાંતો બાજુની મકાઈવાળી મેના સાથે ગપશપ લડાવતો હોય છે કે પછી સાહેબ લોકોના માવા-ફાકી માટે આંટા ફેરા કરતો હોય છે. એવું તો નથી ને કે એને ટીચરોના સ્કૂટી-એક્ટીવા પાર્ક કરવા જ રાખ્યો છે? અને એને વાલી અને રીક્ષાવાળા વચ્ચેનો ફેર તો સમજાવો! હું છેલ્લા દોઢ વરસથી અમારા સલ્લુને લેવા-મૂકવા માટે આવું છું, પણ હાળો અઠવાડિયામાં ત્રણ વાર ગમે તે રીક્ષા બતાવીને મને પૂછે છે કે ‘આ તમારી રીક્ષા છે? જરા આઘી મૂકો ને!’ આ કંઈ રીત છે? એ ના સુધરે તો પછી અમને વાલી માટેના ખાસ બેજ કે આઈ-કાર્ડ આપો.

ઠીક છે. એમ તો ઓળખવામાં કોઈવાર મારી પણ ભૂલ થાય છે. પણ એમાં મારો વાંક નથી, આજકાલ ટીચરો જ સ્કૂલમાં જીન્સ ટીશર્ટ પહેરીને ફરતી હોય તો આપણને શું ખબર પડે? આ ગયા ‘પેરેન્ટ્સ ડે’ની જ વાત કરું. હું જેને અમારા સલ્લુના દોસ્તની મમ્મી સમજતો હતો એ એની ક્લાસ ટીચર નીકળી! એ દિવસથી અમારો સલ્લુ ક્લાસમાં લગભગ ઉભો ઉભો જ ભણે છે અને કે. જી.નો સ્ટુડન્ટ હોવા છતાં ક્લાસ ટીચર એને કલાપીની કવિતાઓ દસ-દસવાર ઉતારવાનું હોમવર્ક આપે છે! તમે લોકો જો વાલીઓને બિલ્લા આપો તો આવી બબાલ તો ન થાય! કાં પછી ટીચરો માટે પણ અલગ યુનિફોર્મ રાખો જેથી આવા લોચા ના થાય.

અને યુનિફોર્મની જ વાત નીકળી છે તો એક વાત એ પણ જણાવી દઉં કે સવારના સ્કૂલના દરવાજે યુનિફોર્મ ચેક કરવા પી.ટી. ટીચર દિનેશ ભાઈ ઉર્ફે ‘ડેની સર’ ઉભા રહે છે એમનું પોતાનું જીમ છે! અને તમને કદાચ ખબર નહિ હોય પણ તમારી સ્કૂલની ઘણી બધી ટીચરો સાંજે એના જીમ પર મફતમાં વર્ક-આઉટ કરવા જાય છે. આટલું જ નહિ પણ ડેની સર કલબોમાં થતા ઈવેન્ટ્સમાં બાઉન્સરોની સેવાઓ પણ પૂરી પડે છે. એ પોતે પણ એક બાઉન્સર જ છે! હમણાં શાહરુખ આવ્યો ત્યારે ટી.વી. પર ભીડમાં મેં એમની મુંડી જોઈ હતી. તમને એટલા માટે કહ્યું કે આજકાલ શિક્ષણ જગતમાં બાઉન્સરો રાખવાનું ‘ઇન-થીંગ’ ગણાય છે તો મેકુ તમારે કામ આવે કદાચ, બીજું કંઈ નહિ.

Dear Principal Sir-2    ખેર જવાદો એ વાત. મારે એક વાત એ કરવાની હતી કે જન્માષ્ટમી અને ક્રિસમસ પર તમે લોકો જે ફેન્સી ડ્રેસ કોમ્પીટીશન રાખો છો એમાં કોઈ નીતિ-નિયમ જેવું હોય છે કે પછી એમ જ ચલાવો છો? આ વખતે દર ત્રીજું ટેણિયું કૃષ્ણ બનીને આવ્યું હતું! ક્રિસમસ વખતે પણ ગામમાં સાન્તા ક્લોસના આઉટ-ફીટના બ્લેક બોલાતા હોય છે! સ્ટેજ ઉપર સાન્તાનું એવું ધાડું હોય છે કે અસલી સાન્તા જુએ તો બિચારો બેભાન જ થઇ જાય. અને તમે લોકો જજ તરીકે કેવા ખડૂસ લોકોને લઇ આવો છો? આ વખતે જજ તરીકે કોઈ સાક્ષર શ્રીને પકડી લાવ્યા હતા! હવે એ સાક્ષર ને ફેન્સી ડ્રેસ સાથે શું લેવાદેવા? આ એમનો વિષય છે? આના કરતાં કોઈ યુવાન રેડિયો જોકી કે કોરિયોગ્રાફરને જજ તરીકે લાવો તો બચ્ચા પાર્ટીને ન્યાય તો મળે!

અમારો સલ્લુ આ વખતે ટારઝન બન્યો હતો અને દોરડાથી ઝૂલતા ઝૂલતા સ્ટેજ પર એવી જોરદાર એન્ટ્રી મારી હતી કે ઓડિયન્સમા પાંચ મીનીટ સુધી તો તાળીઓ પડી હતી. પણ પ્રાઈઝ ના મળ્યું! બાકી હતું તો સાક્ષર શ્રીએ પ્રવચનમાં ચોપડાવી કે ‘જિંદગીમાં મેં પહેલીવાર ઘડિયાળવાળો ટારઝન જોયો!’ હવે એને કેમ સમજાવું કે અમારો સલ્લુ નહાતી વખતે પણ ઘડિયાળ કાઢતો નથી! અને સલ્લુના બાપાને અવળા હાથે અને એ પણ ઉંધી ઘડિયાળ પહેરવા માટે ભૂતકાળમાં આઠ છોકરીઓ રીજેક્ટ કરી ચૂકી છે. માટે આવા સાક્ષરને બદલે કોઈ પ્રેક્ટિકલ માણસને જજ તરીકે લાવો અને એમનાં ફોન નંબર નોટીસબોર્ડ પર અઠવાડિયા પહેલાં મૂકો તો કંઈ મેનેજ કરવું હોય તો ખબર પડે.

તમને જાણીને આશ્ચર્ય થશે કે આ ટારઝનનો રોલ કરવા માટે અમારે એને કોઈ ટ્રેનિંગ આપવી જ નહોતી પડી! ઘરમાં હોય કે સ્કૂલમાં, ઠેકડા મારવામાં સલ્લુ મને પણ આંટી જાય એવો છે! પણ સ્કૂલમાં તો ટીચરના ટેબલ પર ચઢી ભૂસકો મારે તેમાં તો ટીચર આવડા અમથા છોકરાને પકડીને તમારી ઓફિસમાં ઉભો કરી દે છે. પણ તમે એ વિચાર્યું છે કે ચાલુ ક્લાસે આમ એક છોકરાને પકડીને પ્રિન્સીપાલની ઓફિસે લઈ જાય તે દરમ્યાન ક્લાસના બીજાં ઓગણ સાઇંઠ છોકરાં શું કરતાં હશે એ અડધો કલાક? અને આ ભૂલકા ભૂસકા નહી મારે તો શું તમે અને હું મારીશું? મારું માનો તો તમે ક્લાસમાં ડનલોપના ગાદલા મુકાવો જેથી છોકરાઓને ભૂસકા મારવામાં વાગી-બાગી ન જાય. હું તો ત્યાં સુધી કહું છું કે એમના માટે ટ્રેમ્પોલીન લાવી આપો અને ભૂસકા મારવાના ખાસ પીરીયડ રાખો. કદાચ એમાંથી દેશને જીમ્નાસ્ટીક્સમાં મેડલ અપાવનારો કોઈ મળી આવે! વિચારી જોજો.

બીજી એક માથાકૂટ અમારે તમારા ડ્રોઈંગ ટીચર સાથે થાય છે. પહેલું તો એ કયા પ્રાણીને ઘોડો ગણે છે અને કયા પ્રાણીને ગધેડો ગણે છે એ અમારે જાણવું છે. હજુ ગયા અઠવાડિયે એમણે હોમવર્કમાં ઘોડો દોરી લાવવાનું કહ્યું તો અમે અમારા સલ્લુને ઘોડો બતાવવા લો ગાર્ડન લઇ ગયા, નેટ ઉપર ઘોડાના ફોટા અને વિડીયો પણ બતાવ્યો. પછી અમે એની પાસે સરસ ઘોડો દોરાવ્યો. તો તમારા ડ્રોઈંગ ટીચર કહે કે આવડું મોટું સસલું એમણે કદી જોયું જ નથી! હદ છે સાહેબ! મેં તો કહ્યું કે ચાલો મારી સાથે, તમને બતાવું, પણ ન માન્યા. અમારા મતે તો છોકરું ચાર પગ, મોઢું, કાન અને પૂછડું દોરે એટલે એમાં ઘોડું, ગધેડું, કૂતરું અને બલાડું બધું આવી ગયું ગણાય. અમારે ક્યાં એને એમ. એફ. હુસેન બનાવવો છે!

એક ફરિયાદ પ્રોજેક્ટ વર્કમાં ચાલતા ડીંડવાણા બાબતની છે. તમારા ટીચર્સ પ્રોજેક્ટ વર્કમાં માટે વાલીઓ અને વિદ્યાર્થીઓની ગાળ ઉપરાંતની મેથી મારે છે. અમારા જમાનામાં ક્રાફ્ટ હતું તે સારું હતું કે રંગીન કાગળો કાતરીને ચોટાડી દેતા તો પતી જતું હતું! હવે તો બચ્ચાં વતી અમારે નેટ-સર્ફિંગ કરવાનું, ઈમેજીઝ ડાઉનલોડ કરવાની, એની કલર પ્રિન્ટ લેવાની, કાપકૂપ કરવાની, કોઈ ડી.ટી.પી.વાળા પાસે કેપ્શન કરાવવાના અને પછી આખો ડિસ્પ્લે બનાવવાનો! અને આટલું બધું કરીએ તોયે દેખાદેખીમાં છોકરાં એલ.ઈ.ડી. લાઈટ્સ અને એનીમેટેડ કેરેક્ટર્સ માટે જીદ કરે છે! અલા ભ’ઈ, આ બધું કે.જી.-નર્સરીના છોકરાંનું કામ છે? કહેતા બી દીવાના ને સુણતા બી દીવાના? કોઈ લીમીટ હોય કે નહિ? અને આ બધું વાલીઓએ જ કરવાનું હોય તો પછી ભણવા પણ અમે જ આવીએ!

એજ રીતે હોમવર્ક આપવાની પણ કોઈ લીમીટ હોયને? કે.જી.ના છોકરાને એટલું તો કેટલું હોમવર્ક આપવાનું કે એનાં બાપાએ ટેનીસ એલ્બો માટે ફીઝીયોથેરાપી ટ્રીટમેન્ટ કરાવવી પડે? એમાંય પાછું કર્સીવ રાઈટિંગ જોઈએ! હવે પાકાં ઘડે કાંઠલા ક્યાંથી ચઢે? એની મમ્મી અને મેં છ મહિના કર્સીવ રાઈટિંગના ક્લાસ ભર્યા ત્યારે એનું લેસન ટાઈમસર થતું થયું. અને ફ્રેન્કલી કહું? કેજીના છોકરાને આટલું હોમવર્ક આપવું જ હોય તો પછી કોમ્પ્યુટર પ્રિન્ટ આઉટની જ છૂટ આપી દોને તો અમારે આંગળા તો તોડવા ન પડે. અને આટલું પાછું પૂરતું નથી. ઓફિસેથી આવીને અમે ટેનીસની મેચનો ભોગ આપીને પણ હોમવર્ક કરી આપીએ તોયે પાછી ટીચર અક્ષરના માર્ક કાપે છે. એ બેનને કહીએ કે તમારા બોયફ્રેન્ડની ખીજ હોમવર્કની નોટ પર ના કાઢો. પાછા રૂપિયાની રીફીલ નાખેલી સુકાયેલી બોલપેનથી સલ્લુની નોટ પર એવી ખીજ કાઢે છે એમાં પાછળના આઠ પાનાં ફાટી જાય છે. સોરી હોં, જરા ઉગ્ર થઇ જવાયું. પણ તમે મારો કહેવાનો મતલબ સમજો.

અને ખોટું પણ ના લગાડતા, આતો જરા લાગણીમાં લખાઈ ગયું. બાકી અમારા ફ્લેટના પાર્કિંગમાં ટુ વ્હીલર, ગાડીઓ અને થાંભલા વચ્ચે મળે એટલી જગ્યામાં રમેલા અમારા સલ્લુને તો સ્કૂલમાં એટલી મઝા પડી ગઈ છે કે સ્કૂલ છૂટ્યા પછી અડધો કલાક તો એ અને એના દોસ્તારો ફાટેલા ફૂટબોલને લાતો મારવામાં કાઢે છે. મારે પરાણે એને ઘસડીને એને ઘરે લઇ જવો પડે છે. સ્કૂલના એન્યુઅલ ડેના દિવસે એને સ્ટેજ પર ‘ઈચક દાના બીચક દાના…’ ગીત પર ગ્રુપ સાથે ડાન્સ કરતો જોયો એ વખતે મારું અધૂરું સ્વપ્નું સાકાર થતું લાગ્યું! બાકી અમારા જમાનામાં ટીચર્સ કડક હતા તો અમારી બદમાશીઓ પણ ઉંચા માંહ્યલી રહેતી. એની સામે અત્યારના છોકરાં કદાચ તોફાની હશે પણ બદમાશ નથી લાગતા. હશે, એ લોકો પણ કિસ્મતના લેખ લખાવીને આવ્યા હશે ને!

બસ. આટલું કહેવાનું હતું. બાકીનું રૂબરૂમાં મળીશું ત્યારે.

આપનો જ,
પુષ્કર કે. સળીકર

3864

About 'બધિર' અમદાવાદી

Columnist with: નવગુજરાત સમય દૈનિક (Jointly with Adhir Amdavadi) ફીલિંગ્ઝ ગુજરાતી મેગેઝીન (કહત બધિરા) Wrote for: મારી સહેલી મેગેઝીન (Monkey बात) અભિયાન મેગેઝીન (Special issues) દિવ્ય ભાસ્કર ડોટ કોમ (બધિર ખડા બાઝાર મેં)
This entry was posted in અભિયાન and tagged , , , , , , , , , . Bookmark the permalink.

4 Responses to ડીયર પ્રિન્સીપાલ સર …

  1. Umesh Shah કહે છે:

    Badhirbhai ,

    excelent.simply excellent.you are getting bettere with every article and am afraid that one day you will find going higher really an uphill task,byw , in new high school near old regal talkies, teachers were asked to wear topi once they get down their bicycle for better pehchaan.

    Like

  2. Ketan કહે છે:

    hahahahhaha M.F. Hussain. Ecellent too much home work and being a parent he has written super duper letter. Now a days, why even to draw horse or donkey.

    Like

આપનો પ્રતિભાવ અમારા માટે અમુલ્ય છે. પ્રતિભાવ આપતી વખતે નીચે આપનું નામ લખવાનું ચૂકશો નહિ.

Fill in your details below or click an icon to log in:

WordPress.com Logo

You are commenting using your WordPress.com account. Log Out /  બદલો )

Google photo

You are commenting using your Google account. Log Out /  બદલો )

Twitter picture

You are commenting using your Twitter account. Log Out /  બદલો )

Facebook photo

You are commenting using your Facebook account. Log Out /  બદલો )

Connecting to %s