ડાન્સ લાઈક કાકા!


મનથી માઈકલ જેક્સન પણ તનથી તૂટી ગયેલા કાકાઓ … મચી પડો!

ચાસ વર્ષના થવું એ કોઈ મોટી વાત નથી અને છે પણ ખરી. મોટી વાત નથી એટલા માટે કે જે લોકો એકાવન વર્ષથી લઈને ૧૦૨ સુધી નોટ આઉટ રહેતા હોય છે એ લોકો જીવનમાં એકવાર તો પચાસના થાય જ છે અને આજીવન ફિફ્ટી પ્લસ રહે છે. પણ જીવન ૨૦-૨૦ મેચ જેવું છે; એમાં ઘણા ૭૦ બોલમાં ૫૦ રન જેવું જીવતા હોય છે. આવા સ્ટ્રાઈક રેટથી અડધી સદી કરી ગણાય પણ એનાથી મેચ ના જીતી શકાય. પચાસ વર્ષની ઉંમરમાં છોકરા-છોકરી બેઉના લગ્ન કરી નાખ્યા હોય, ત્રણ વિદેશ યાત્રા (દુબઈ, સિંગાપોર અને નેપાળ), અને ચાર ધામ પણ કરી આવ્યા હોય. એ મોટેભાગે પેન્શન સ્કીમો વાંચવામાં દહાડા કાઢતા હોય છે. ફટ છે આવી જીંદગીને. અરે, જુઓ પેલા પ્રોફેસર સંજીવ શ્રીવાસ્તવનો વિડીયો જેમાં એણે ગોવિંદા જેવો અદ્દલ ડાન્સ કરીને આખા દેશને હલાવી નાખ્યો છે. કમસેકમ પ્રિયા પ્રકાશના આંખ મારતા વિડીયો કરતા ગોવિંદા ડાન્સ કરતા કાકા પાછળ પ્રજા ઘેલી થાય તે વધુ ઇચ્છવા યોગ્ય છે. કારણ કે પેલી તો હિરોઈન છે, કરે એ એવું બધું. કાકા કરે તે નવાઈનું છે.

એટલે જ અમારે કહેવાનું છે કે ક્યાં સુધી કાકાઓ તમે પ્રેશર-ડાયાબિટીશ-કોલેસ્ટોરોલથી ડરીને ગાર્ડનમાં ચાલવા જશો? એક વાત સમજો. માત્ર ચડ્ડી પહેરવાથી જુવાન નથી થઈ જવાતું વડીલ. અમે કંઈ તમને રણવીર કપૂરની જેમ સ્કર્ટ પહેરીને ફરવાનું નથી કહેતા. જો પ્રોફેસર શ્રીવાસ્તવે ‘લોકો શું કહેશે?’ વિચાર્યું હોત તો એ આટલા ફેમસ ના થયા હોત. હવે તમે એમ કહેશો કે ફેમસ થવું એ કોઈ માપદંડ છે? ના, ફેમસતા એ માપદંડ નથી, પરંતુ એક મિનીટ છત્રીસ સેકન્ડના વિડીયોથી કરોડો લોકોને મોજ કરાવી દેવી એ જેવી તેવી ઉપલબ્ધિ નથી. પૂછવું હોય તો પૂછી જુઓ કોઈ એવા યુથ આઇકોન નેતાને કે ત્રણસો રૂપિયા કેશ, ફૂડ પેકેટ, બે ટાઈમ ચા, અને જવા આવવાની વ્યવસ્થા કર્યા પછી પણ જેમની સભામાં ખુરશીઓ ખાલી રહેતી હોય છે.

જોકે આપણે ત્યાં ગાડરિયો પ્રવાહ છે. બાવો નાચ્યો એટલે બગલુય નાચ્યું એ ઉક્તિ સાચી ઠેરવવા એક વિડીયો વાઈરલ થયો એટલે હવે બીજા કેટલાયે કાકાઓના વિડીયો તમારા વોટ્સેપમાં ટપકશે. જરા હિંમત રાખજો. ફેસબુક ઉપર દીકરીઓ ‘માય પાપા, માય રોકસ્ટાર’ના સ્ટેટસ નીચે એમના પૂજ્ય પિતાશ્રીનો ઢંગધડા વગરનો વિડીયો મુકીને લાઈક્સ ઉઘરાવશે. આવી કન્યાઓનું બોયફ્રેન્ડપદ પામવા ઈચ્છુક નબીરાઓ ડાન્સના નામે કસરતના દાવ કરતા એ કાકાના વિડીયો પર કોમેન્ટમાં ‘વાઉ, અંકલ રોક્સ…’ લખીને હવા પણ ભરશે. ઘરમાં નવરા બેઠા બેઠા ચા-નાસ્તાના ઓર્ડરો છોડનારા રીટાયર્ડ કાકાઓને કાકીઓ ગોદા મારી મારીને ડાન્સ ક્લાસમાં મોકલશે. પરંતુ મનથી માઈકલ જેક્સન પણ તનથી તૂટી ગયેલા કાકાઓ આજકાલના એક્રોબેટિક ડાન્સ મુવ બતાવી શકે એ શક્યતા ઓછી છે. ફાંદ અને ‘વા’ની તકલીફવાળા કાકાઓને તો ભગવાન દાદા, રાજેશ ખન્ના અને બચ્ચનની ડાન્સ સ્ટાઇલ સુગમ પડે, જેમાં માત્ર ડગુમગુ ચાલતા ચાલતા ટ્રાફિક પોલીસની જેમ હાથ ઊંચા નીચા કરવાના હોય છે. આવો વિડીયો વાઈરલ થશે કે નહીં એ તો ખબર નથી, પણ લાફેબલ તો હશે જ એ લખી રાખજો.

ડાન્સ કરવામાં સૌથી પહેલા સ્ફૂર્તિ જોઈએ. ડાન્સના સ્ટેપ કરતાં કરતાં ગમે ત્યારે ૯૦ ડીગ્રીનો ટર્ન મારવો પડે કે અચાનક ચાર ડગલા દોડીને બ્રેક મારવાની પણ આવે ત્યારે આપણી આ બે પગવાળી ઓવર-લોડેડ ટ્રકો ઢસડાય એવી પૂરી શક્યતા છે કારણ કે, ભગવાને આપણા પગમાં એબીએસ, એબીડી, ઈપીએસ કે એવી બીજી કોઈ એબીસીડી અક્ષરો ભેગા કરીને બનતી હોય એવી ટેકનોલોજીવાળી બ્રેક નથી મૂકી. એટલે અકસ્માતમાં થાય એવું બને. માનસિક રીતે તમે બ્રેક મારી દીધી હોય પણ શારીરિક રીતે બ્રેક ન વાગે એવું બને. અમે બેડમિન્ટન રમતી વખતે આવું અનુભવ્યું છે. કે માનસિક રીતે અમે શટલ સુધી પહોંચી ગયા હોઈએ પણ શારીરિક રીતે પહોંચીએ એ પહેલા શટલ ત્રણેક ફૂટ દૂર જમીન પર જઈને ઠર્યું હોય! આમાં મનથી ઓછું અને તનથી વધુ કામ લેવાનું હોય છે. પ્રભુ પ્રાપ્તિમાં જેમ તન અને મન બધું પ્રભુમાં લીન કરવું પડે, તેમ ડાન્સ એકલા મનથી નથી થઈ શકતો. એવું થતું હોત તો સની દેવલ આટલો બદનામ ના હોત.

​​આપણે નસીબદાર છીએ કે આપણી પાસે અભિવ્યક્તિના અનેક માધ્યમો છે. આપણે બોલીને, લખીને કે ઇશારાથી પણ વાત કહી શકીએ છીએ. ડાન્સ પણ અભિવ્યક્તિનું માધ્યમ છે. પેલા કાકાએ ડાન્સ કરીને સાબિત કર્યું કે કાકા ડાન્સ અને ઉંમરને સંબંધ નથી! એક કાકા તરીકે તમે ઘણું બધું કરી શકો એમ છો. અમે એમ નથી કહેતા કે આ સહેલું છે. પ્રેમીઓને જેમ જાલિમ જમાનો રોકે છે એમ અમારા કાકી અને તમારા પગ, ફાંદ અને ફિટનેસ તમારા દરેક પગલાનો વિરોધ કરશે, પણ મોળા ન પડશો. તમે જો ઘરમાં પીપડા ખસેડ્યા હશે તો કાકીને પણ ડાન્સમાં શામેલ કરી શકશો. નાનપણમાં પતંગો ચગાવ્યા હશે, યુવાનીમાં ગરબા કર્યા હશે, પી.ટી. પીરીયડમાં કદમતાલ અને ગણતંત્ર દિવસે માર્ચપાસ્ટ કર્યા હશે તો તમારા માટે કંઈ અઘરું નથી. સની દેઓલ અને અક્ષય કુમાર આવું કરીને જ ચાલી ગયા છે.

તો બેસી શું રહ્યા છો?

ઉભા થાવ કાકા, તમારી અંદરના જેક્સનને જગાડો અને મંડી પડો! લેટ ધ હોલ વર્લ્ડ નો.

વન, ટુ, થ્રી, ફોર ગેટ ઓન ધ ડાન્સ ફ્લોર !

મસ્કા ફન

‘ક્યાં ચાલ્યા રાજા?’

‘પેટ્રોલમાં એક પૈસાનો ભાવ ઘટાડો ઉજવવા આબુ જઈએ છીએ’.

 

About 'બધિર' અમદાવાદી

Columnist with: નવગુજરાત સમય દૈનિક (Jointly with Adhir Amdavadi) ફીલિંગ્ઝ ગુજરાતી મેગેઝીન (કહત બધિરા) Wrote for: મારી સહેલી મેગેઝીન (Monkey बात) અભિયાન મેગેઝીન (Special issues) દિવ્ય ભાસ્કર ડોટ કોમ (બધિર ખડા બાઝાર મેં)
This entry was posted in નવગુજરાત સમય and tagged , , , , . Bookmark the permalink.

2 Responses to ડાન્સ લાઈક કાકા!

  1. Deejay.Thakore કહે છે:

    સલાહ ગમે તેવી છે. જરુર પ્રયત્ન કરશો તો સફળતા મળશે.

    Like

આપનો પ્રતિભાવ અમારા માટે અમુલ્ય છે. પ્રતિભાવ આપતી વખતે નીચે આપનું નામ લખવાનું ચૂકશો નહિ.

Fill in your details below or click an icon to log in:

WordPress.com Logo

You are commenting using your WordPress.com account. Log Out /  બદલો )

Google photo

You are commenting using your Google account. Log Out /  બદલો )

Twitter picture

You are commenting using your Twitter account. Log Out /  બદલો )

Facebook photo

You are commenting using your Facebook account. Log Out /  બદલો )

Connecting to %s